ഗണേശോത്സവ ട്രസ്റ്റ് കമ്മിറ്റിയുടെ ആഭിമുഖ്യത്തില്‍ ആഗസ്റ്റ് 28 ന് ആരംഭിച്ച ഗണേശോത്സവ ആഘോഷങ്ങള്‍ക്ക് സമാപനം കുറിച്ചു കൊണ്ടുള്ള  സാംസ്‌ക്കാരിക സമ്മേളനത്തിനും ഗണേശ വിഗ്രഹ ഘോഷയാത്രയ്ക്കും നിമജ്ജന യജ്ഞത്തിനും തലസ്ഥാനം വേദിയായി.

സാംസ്‌കാരിക സമ്മേളനത്തില്‍ വച്ച് ഗണേശോത്സവ ട്രസ്റ്റിന്റെ 5-ാം മത് ഗണേശ പുരസ്‌കാരം പങ്കജകസ്തൂരി ഗ്രൂപ്പ് എം.ഡി ഡോ. ജെ. ഹരീന്ദ്രന്‍ നായര്‍ക്ക് കൈമാറി. ട്രസ്റ്റിന്റെ മുന്‍ കണ്‍വീനറായിരുന്ന മിന്നല്‍ പരമേശ്വരന്‍നായരുടെ പേരിലുള്ള പ്രത്യേക പുരസ്‌കാരം ജ്യോതിഷ പണ്ഡിതന്‍ മലയിന്‍കീഴ് പുരുഷോത്തമന്‍ ഏറ്റുവാങ്ങി. പഴവങ്ങാടി ഗണപതി ക്ഷേത്രത്തില്‍ നിന്ന് പകര്‍ന്നു നല്‍കിയ ദീപം ഗണേശ വിഗ്രഹത്തിന്‍ മുന്നില്‍ തെളിയിച്ചുകൊണ്ടാണ് ഘോഷയാത്ര ഉദ്ഘാടന ചടങ്ങ് നടന്നത്.
കിഴക്കേകോട്ടയില്‍ നിന്നും ആരംഭിച്ച ഘോഷയാത്ര  ശംഖുമുഖം ആറാട്ടുകടവില്‍ എത്തിച്ചേര്‍ന്നൂ. പൂജകള്‍ക്കുശേഷം ഗണേശവിഗ്രഹങ്ങള്‍ കടലില്‍ നിമജ്ജനം ചെയ്തൂ.  വിഗ്രഹ നിമജ്ജനത്തോടനുബന്ധിച്ച് ലോക ക്ഷേമ ഐശ്വര്യത്തിനുമായി മഹാഗണേശോത്സവ യജ്ഞം നടന്നൂ.  താന്ത്രിക പ്രമുഖന്മാരുടെ മുഖ്യ കാര്‍മ്മികത്വത്തില്‍ ശംഖുമുഖത്ത് ഒരു ലക്ഷത്തിയെട്ട് നാളികേരം കൊണ്ടുള്ള യജ്ഞ ചടങ്ങുകളാണ് നടന്നത്.