തിരുവനന്തപുരം:ഗുരു ഹിന്ദു മതത്തെയല്ല മനുഷ്യ മനസ്സുകളെയാണ് നവീകരിച്ചത്. ഇതോര്‍ക്കാതെയാണ് ശ്രീനാരായണ ധര്‍മ്മസംഘം ട്രസ്റ്റ് അംഗമായ സ്വാമി ശാരദാനന്ദ ഗുരുവിനെ ഹിന്ദു സന്യാസിയെന്ന് വിശേഷിപ്പിച്ചതെന്ന് മുഖ്യമന്ത്രി പിണറായി വിജയന്‍ പറഞ്ഞു. നമുക്ക് ജാതിയില്ലാ വിളംബരത്തിന്റെ ശതാബ്ദിയാഘോഷങ്ങളുടെ സംസ്ഥാനതല ഉദ്ഘാടനം കേരള സര്‍വ്വകലാശാല സെനറ്റ് ഹാളില്‍ നിര്‍വ്വഹിക്കുയായിരുന്നു അദ്ദേഹം. ഒരു മതത്തിലും ഉള്‍പ്പെടില്ലെന്ന് പ്രഖ്യാപിച്ച ഗുരുവിനെ അദ്ദേഹത്തിന്റെ സ്മരണ നിലനിറുത്തുന്നതിനുള്ള ട്രസ്റ്റിനുള്ളിലിരുന്ന് ഇങ്ങനെ പറയുന്നത് എന്തടിസ്ഥാനത്തിലാണെന്നും മുഖ്യമന്ത്രി ചോദിച്ചു.

നാം പ്രത്യേക ജാതിയിലോ മതത്തിലോ ഉള്‍പ്പെടുന്നില്ല എന്ന ജാതിയില്ലാ വിളംബരത്തിന്റെ കാതല്‍ തന്നെ തകര്‍ക്കുകയാണ് സംഘ്പരിവാര്‍. ഇതിന്റെ ഭാഗമായാണ് ഗുരുവിനെ ഹിന്ദുമത സന്യാസിയാക്കാനുള്ള ശ്രമം. ഇന്ത്യന്‍ സ്വാതന്ത്ര്യ സമരത്തിനോ നവോത്ഥാന മുന്നേറ്റത്തിനോ ഒരു സംഭാവനയും നല്‍കിയിട്ടില്ല സംഘ് പരിവാര്‍. ജനമനസ്സുകളില്‍ ഇടം നേടുന്നതിന് ഇതൊരു കുറവാണെന്ന് കരുതിയാകണം സ്വാതന്ത്ര്യസമര പ്രതീകങ്ങളേയും നവോത്ഥാന പ്രതീകങ്ങളെയും റാഞ്ചാനുള്ള പദ്ധതി. ഇത് പടിപടിയായി നടപ്പിലാക്കുന്നതിന്റെ ഭാഗമായാണ് അവര്‍ ശ്രീ നാരായണ ഗുരുവിലേക്ക് എത്തിയിരിക്കുന്നതെന്ന് മുഖ്യമന്ത്രി പറഞ്ഞു


15 ലക്ഷം പേരിലേക്ക് വിളംബര സന്ദേശം എത്തിക്കുകയെന്ന ലക്ഷ്യത്തോടെ സംസ്ഥാന സര്‍ക്കാര്‍ നടത്തുന്ന രണ്ടുമാസം നീളുന്ന ആഘോഷ പരിപാടികളുടെ ഭാഗമായി സംസ്ഥാനതല സെമിനാറുകളും ജില്ലാതല സെമിനാറുകളും നടത്തും. ഗ്രന്ഥശാലാ സംഘത്തിന്റെ ആഭിമുഖ്യത്തില്‍ 6500 കുടുംബസംഗമങ്ങളും നടക്കും. കൂടാതെ ശ്രീ നാരായാണ ഗുരുവിന്റെ വിളംബരരേഖ ഗ്രന്ഥശാലകളിലും സ്‌കൂളുകളിലും പതിപ്പിക്കും.