തിരുവനന്തപുരം: സംസ്ഥാന സര്‍ക്കാരിന്റെ സാംസ്‌കാരിക വിനിമയ സ്ഥാപനമായ ഭാരത് ഭവനും ഇന്ത്യന്‍ കൗസില്‍ ഫോര്‍ കള്‍ച്ചറല്‍ റിലേഷന്‍സും ചേർന്നൊരുക്കിയ റാം കൊത്തേകറുടെ ഹാര്‍മോണിയം വാദനം വേറിട്ട ശ്രവ്യാനുഭവമായി.  രാഗങ്ങളെ ഉള്ളംകയ്യിലെ നെല്ലിക്കപോലെ എടുത്തു പ്രയോഗിച്ച കൊത്തേകര്‍ രാഗഭാവം സ്ഫുരിപ്പിക്കുതില്‍ അനുപമമായ പാടവം പ്രദര്‍ശിപ്പിച്ചു. ഭാരത് ഭവന്‍ ശെമ്മാങ്കുടി സ്മൃതിയിലെ നിറഞ്ഞ സദസ്സ് ശുദ്ധ സംഗീതത്തിന്റെ തേന്മഴയില്‍ മതിമറന്നിരുന്നു. നേരത്തേ ഭാരത് ഭവന്‍ മെമ്പര്‍ സെക്രട്ടറി പ്രമോദ് പയ്യന്നൂര്‍ റാം കൊത്തേകറെയും സംഘത്തെയും സ്വാഗതം ചെയ്തു. റാം കൊത്തേകറുടെ ഭാര്യ രാഗിണി കൊത്തേകര്‍, മകന്‍ ശരുണി കൊത്തേക്കര്‍, ശിഷ്യന്‍ ഉമേഷ് കൊത്തേകര്‍ എന്നിവരാണ് കച്ചേരിക്ക് പക്കമേളമൊരുക്കിയത്.  

പിതാവ് ഉദ്ദവ് റാവു കൊത്തേകറില്‍ നിന്ന് സംഗീതത്തിന്റെ ബാലപാഠങ്ങള്‍ അഭ്യസിച്ച റാം കൊത്തേകര്‍ അക്കാലത്തെ പ്രശസ്ത്രായ പല ഗുരുക്കന്മാരില്‍ നിന്നും സംഗീതത്തിലും ഹാര്‍മോണിയത്തിലും തുടര്‍ പഠനം നടത്തി.  മഹാരാഷ്ട്രയിലെ പ്രമുഖ സംഗീതജ്ഞരോടൊപ്പമെല്ലാം വേദി പങ്കിട്ട ഇദ്ദേഹം പല ഇന്ത്യന്‍ സംസ്ഥാനങ്ങളിലും വന്‍കിട സംഗീതോത്സവങ്ങളില്‍ കച്ചേരി അവതരിപ്പിച്ചിട്ടുണ്ട്. മുപ്പത്  വര്‍ഷമായി ഐസിസിആറിന്റെ കലാകാരനായി പ്രവര്‍ത്തിച്ചുവരുന്നു.